UEUk zazpi ikastaro eskainiko ditu Eibarren urritik abendura bitarte

Teknologia berriak, autismoa, alzheimerra eta 'bullying'-a izango dira jorratuko direngai batzuk

eibar. Udako Euskal Unibertsitateak, etengabeko prestakuntzaren barruan, zazpi ikastaro eskainiko ditu urritik abendura arte Eibarren. Eskaintza horretan, ezagutza esparru ezberdinak landuko dira, haien artean, teknologia berriak, kazetaritza digitala, bullying- a, autismoa eta alzheimerra.

Edonola ere, UEUk antolatutako egitaraua Web 2.0 izenburuko ikastaroarekin jarriko da abian. Kurtso hori urriaren 16tik 30era arte emango da, astelehen eta asteazkenetan, 16.30etik 19.30era. Irakaslea Gorka Julio Hurtado izango da.

Bigarren ikastaroa Emakumearen gorputza eta erotika izenburupean garatuko da, urriaren 17tik azaroaren 14ra, hain zuzen ere. Eskolak astearteetan egingo dira, 16.30etik 19.30era, eta irakaslea Maider Garcia de Vicuña izango da.

Bestetik, Berdinen arteko bortxakeria eskoletan: bullying-a ikastaroa egingo da urriaren 21etik azaroaren 4ra arte, larunbatetan, 9.00etatik 14.00etara eta Jose Antonio Oñederra irakaslearekin. Egitarauarekin jarraiki, Dementziak eta alzheimerra: zer dira eta zer egin? izenburuko ikastaroa egingo da azaroaren 11tik 25era, larunbatetan eta aurreko ikastaroko ordutegi berarekin. Dementzia eta alzheimerraren gaiak landuko dituen ikastaroko irakasleak Izarne Lizaso, Maitane Fernandino, Silvia Camino eta Josune Mendez de Cruz izango dira.

Udako Euskal Unibertsitatetik esandakoari eutsiz, "Eibarko Udalak lau ikastaro horietan parte har-tzeko diru laguntza emango du".

eskaintza zabala Udalaren laguntza izango ez badute ere, UEUk beste hiru ikastaro prestatu ditu datozen hiru hilabeteetarako. Hauetako bat Arte-prozesuen erabilera tratamendu terapeutikoetan izenburupean egingo da, urriaren 21etik azaroaren 4ra, Irantzu Olabarrieta, Ruth Antolin eta Edurne Fernandez irakasleekin.

Bestalde, Edizio digitala euskarazko kazetaritzan ikastaroa egingo dute urriaren 19tik azaroaren 9ra, ostegunero. Antolatzaileen esanetan, "Gaur egungo kazetari lanaren atal bat bertatik ezagutzeko aukera eskainiko du ikastaro honek eta, helburu nagusia teknologia berrien erabilera efektibo batera iristea denez, ordu praktikoek izango dute garrantzia nagusia". Kurtso hau Jon Murelaga eta Aingeru Genaut EHUko irakasleek zuzenduko dute.

UEUk etengabeko prestakuntzaren barruan antolatutako eskain-tza Teaccch metodologia. Autismoaren trataera ikuspegi inklusibotik ikastaroarekin amaituko da. Azken hau urriaren 21etik abenduaren 2ra arte emango da, larunbatetan. Ikastaroetan parte hartzeko asmoa dutenek urriaren 8a baino lehen eman beharko dute izena Eibarko Markeskoa jauregian. >j.l.